ក្រុមប្រឹក្សាភិបាល

ប្រធានក្រុមប្រឹក្សាភិបាល

លោកអ្នកឧកញ៉ាបណ្ឌិត ពុង ឃាវសែ ជាប្រធានក្រុមប្រឹក្សាភិបាល នៃ ធនាគារ ប្រៃសណីយ៍កម្ពុជា ក.អ ធនាគារ កាណាឌីយ៉ា ក.អ និងក្រុមហ៊ុនវិនិយោគទុនអាណិកជនកម្ពុជា (OCIC)។ លោកអ្នកឧកញ៉ាបណ្ឌិតបានចូលរួមយ៉ាងសកម្មក្នុងការវិនិយោគ និងការអភិវឌ្ឍន៍ស្ថាប័នទាំងបី។ លោកអ្នកឧកញ៉ាបណ្ឌិតជាសហគ្រិនដ៏ឆ្នើម និងជាអ្នកដឹកនាំធុរកិច្ចដ៏គួរឱ្យគោរពក្នុងប្រទេសកម្ពុជា ក៏ដូចជាក្នុងប្រទេសកាណាដា និងធ្លាប់បានបម្រើការងារក្នុងមុខតំណែងជាន់ខ្ពស់ជាច្រើន រួមមានប្រធានក្រុមប្រឹក្សាភិបាល ប្រធាននាយកប្រតិបត្តិ និងអភិបាលរបស់ក្រុមហ៊ុនជាច្រើនដូចជា ក្រុមហ៊ុន Oriental Ship Supplies និង ក្រុមហ៊ុន Oriental Commercial Inc.។ លោកអ្នកឧកញ៉ាបណ្ឌិតបានដឹកនាំ ធនាគារ ប្រៃសណីយ៍កម្ពុជា ក.អ ឱ្យទទួលបានភាពរីកចម្រើនយ៉ាងខ្លាំងចាប់តាំងពីឆ្នាំ២០១៣ ក៏ដូចជាធនាគារ កាណាឌីយ៉ា ក.អ ចាប់តាំងពីឆ្នាំ១៩៩១ មក។

មិនត្រឹមតែប៉ុណ្ណោះ លោកអ្នកឧកញ៉ាបណ្ឌិត មានតួនាទីជាប្រធានសមាគមអ្នកសាងសង់កម្ពុជា ដោយធ្វើការយ៉ាងជិតស្និទ្ធជាមួយមេដឹកនាំឧស្សាហកម្មដើម្បីដឹកនាំការអភិវឌ្ឍន៍វិស័យធនាគារ និងសំណង់នៅកម្ពុជា និងធ្លាប់មានតួនាទីជាប្រធានសមាគមធនាគារនៅកម្ពុជាផងដែរ។

លោកអ្នកឧកញ៉ាបណ្ឌិត បានទទួលពានរង្វាន់កិត្តិយសថ្នាក់ “មហាសេរីវឌ្ឍនៈ” ពីព្រះករុណា ព្រះបាទសម្តេចព្រះនរោត្តមសីហនុ ព្រះមហាវីរក្សត្រនៃព្រះរាជាណាចក្រកម្ពុជាក្នុងឆ្នាំ ២០០២ និងទទួលបានមេដៃស្ថាបនាជាតិថ្នាក់លេខមួយ ដែលប្រគល់ជូនដោយ សម្តេចអគ្គមហាសេនាបតីតេជោ ហ៊ុន សែន តំណាងព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាក្នុងឆ្នាំ២០១២ ចំពោះការខិតខំប្រឹងប្រែងយ៉ាងសកម្ម និងនៅតែបន្ត របស់លោកអ្នកឧកញ៉ាបណ្ឌិតក្នុងការចូលរួមអភិវឌ្ឍប្រទេសកម្ពុជា។

នាថ្ងៃទី២១ ខែវិច្ឆិកា ឆ្នាំ២០១៩ លោកអ្នកឧកញ៉ាបណ្ឌិត ពុង ឃាវសែ បានទទួលកិត្តិយសជា “បណ្ឌិតគ្រប់គ្រងផ្នែកពាណិជ្ជកម្ម” ក្រោមអធិបតីដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន ក្នុងពិធីសម្ពោធអគារឥន្ទ្រទេវី នៃ រាជបណ្ឌិតសភាកម្ពុជា។

ប្រធានក្រុមប្រឹក្សាភិបាលរង

លោក Teo Meng Poh Philip ជានាយករងជាន់ខ្ពស់ ផ្នែកហានិភ័យ នៃក្រុមហ៊ុន FFH។ លោក គ្រប់គ្រងលើផ្នែកហានិភ័យផ្សេងៗរបស់ក្រុមហ៊ុនដែលជាបុត្រសម្ព័ន្ធរបស់ FFH ក្នុងប្រទេសចិន និងឥណ្ឌូចិន។ ក្នុងតួនាទីមួយនេះ លោក Teo Meng Poh Philip ក៏មានទំនួលខុសត្រូវបន្ថែមលើការគ្រប់គ្រងហានិភ័យប្រតិបត្តិការ សវនកម្ម និងអនុលោមភាពរួមទាំងការកំណត់គោលនយោបាយ និងក្របខណ្ឌអភិបាលកិច្ច នៃក្រុមហ៊ុនជាច្រើនដែលជាបុត្រសម្ព័ន្ធរបស់ FFH។ លោកក៏ជាអ្នកដឹកនាំហានិភ័យសម្រាប់សកម្មភាពទិញយក និងរួមបញ្ចូលគ្នាផងដែរ (M&A)។ មុនពេលចូលបម្រើការងារជាមួយ FFH លោក Teo ជានាយកប្រតិបត្តិសវនកម្មទៅលើប្រភពដើមរបស់អតិថិជន និងហិរញ្ញវត្ថុសាជីវកម្មនៅធនាគារ Standard Chartered Bank។ លោក Teo Meng Poh Philip បានចាប់ផ្តើមអាជីពជាមួយសាជីវកម្មធនាគារនៅក្រៅប្រទេសចិនដែលមានតួនាទីជាន់ខ្ពស់ទទួលខុសត្រូវចំពោះអតិថិជននៅក្នុងអាជីវកម្មក្រៅប្រទេសរបស់ធនាគារ ដែលមានមូលដ្ឋានស្ថិតនៅក្នុងទីក្រុងសៀងហៃ និងទីក្រុងបាងកក។

អភិបាលឯករាជ្យ

លោក Giang Sovann ជាស្ថាបនិក និងជាប្រធានរបស់ Corporate Governance Academy គាត់បង្ហាត់បង្រៀននៅសាកលវិទ្យាល័យ Singapore Management និងសាកលវិទ្យាល័យ Social Sciences នៃប្រទេស សិង្ហបុរី ទៅលើមុខជំនាញជាច្រើនដែលរួមមានដូចជា ផ្នែកអភិបាលកិច្ចសាជីវកម្មច្បាប់ចុះបញ្ជី ការគ្រប់គ្រងហានិភ័យ បម្រែបម្រួលអាកាសធាតុ និងរបាយការណ៍និរន្តរភាពជាដើម។ លោកក៏បង្រៀនមុខវិជ្ជា អភិបាលកិច្ចសប្បុរសធម៌នៅសាកលវិទ្យាល័យ Social Service និងសាកលវិទ្យាល័យ Chartered Accountants ក្នុងប្រទេស សិង្ហបុរី ផងដែរ។ លោក Giang Sovann ជានាយកជាន់ខ្ពស់ ផ្នែកក្រុមប្រឹក្សាអាជីវកម្ម នៃក្រុមហ៊ុន RSM ប្រទេសសិង្ហបុរី ជាប្រធាននៃ អង្គភាពសេវា Environmental Sustainability និងជាប្រធាននាយករង នៃអង្គភាពមិនរកប្រាក់ចំណេញ។ លោកបានចងក្រងអត្ថបទជាច្រើនស្តីអំពីអភិបាលកិច្ចសាជីវកម្ម ការគ្រប់គ្រងហានិភ័យ និងរបាយការណ៍និរន្តរភាពជាដើម។ គំនិតនៃការគ្រប់គ្រងរបស់លោក គឺស្តីអំពី “សសរស្តម្ភទាំង៤ នៃការត្រួតពិនិត្យសាជីវកម្មប្រកបដោយប្រសិទ្ធភាព” និង “គន្លឹះ៨ចំនុចនៃការគ្រប់គ្រងហានិភ័យប្រកបដោយប្រសិទ្ធភាព” ហើយត្រូវបានក្រុមហ៊ុនជាច្រើនយកទៅអនុវត្តតាម។

លោក Giang Sovann ជានាយកប្រតិបត្តិ នៃវិទ្យាស្ថាន The Singapore Institute of Directors នៃប្រទេសសិង្ហបុរី ដែលជាទីកន្លែងដែលលោកបានបម្រើការជាសមាជិកនៃគណៈកម្មាធិការ Organizing Committee of the Singapore
Corporate Award និងជាសហប្រធានគ្រប់គ្រងចាត់ចែងពានរង្វាន់សម្រាប់ក្រុមហ៊ុនសិង្ហបុរីដែលបានចុះបញ្ជី។ លោកមានបទពិសោធន៍ការងារជាង ១០ឆ្នាំ ក្នុងឋានៈជាអភិបាលឯករាជ្យ នៃក្រុមហ៊ុនចុះបញ្ជី SGX។ បទពិសោធន៍និងទំនួលខុសត្រូវជាចម្បងរបស់លោក គឺរួមមាន ប្រធានមិនប្រតិបត្តិគ្រប់គ្រងអភិបាលឯករាជ្យ ប្រធាននៃគណៈកម្មាធិការសវនកម្ម ប្រធាននៃគណៈកម្មាធិការគ្រប់គ្រងហានិភ័យកម្រិតក្រុមប្រឹក្សាភិបាល និងជាសមាជិកគណៈកម្មាធិការជ្រើសតាំងជាដើម។

លោក Giang Sovann មានលក្ខណៈគ្រប់គ្រាន់ជាគណនេយ្យករជំនាញ (Chartered Accountant) ពីស្ថាប័ន Canadian Institute of Chartered Accountants។ លោកក៏ជាគណនេយ្យករជំនាញ និងជាសមាជិកនៃ Singapore Institute of Directors។ លោកធ្លាប់ជាសមាជិកនៃគណៈកម្មាធិការ បណ្តឹង & វិន័យ ជាសមាជិកនៃគណៈកម្មាធិការត្រួតពិនិត្យគណនេយ្យករសាធារណៈ និង Accounting & Corporate Regulatory Authority (ACRA) ។

អភិបាល

លោក តូច ចៅចេក គឺជានាយកប្រតិបត្តិដែលមានបទពិសោធន៍ជាង ២១ឆ្នាំក្នុងវិស័យធនាគារ និងហិរញ្ញវត្ថុក្នុងប្រទេសកម្ពុជា។ លោកត្រូវបានតែងតាំងជាប្រធាននាយកប្រតិបត្តិនៃ ធនាគារ ប្រៃសណីយ៍កម្ពុជា ក.អ ក្នុងឆ្នាំ២០១៣។ ជាមួយជំនាញ និងបទពិសោធន៍ ជាថ្នាក់ដឹកនាំនៅក្នុងគ្រឹះស្ថានហិរញ្ញវត្ថុនានាកន្លងមក លោកបានអភិវឌ្ឍធនាគារ ប្រៃសណីយ៍កម្ពុជា ក.អ ចាប់តាំងពីបើកដំបូង ដោយប្រែទៅជា ធនាគារពាណិជ្ជដ៏ធំមួយនៅប្រទេសកម្ពុជា។

មុនពេលត្រូវបានតែងតាំងជាប្រធាននាយកប្រតិបត្តិនៃ ធនាគារ ប្រៃសណីយ៍កម្ពុជា ក.អ លោកបានកាន់តំណែងជាប្រធាននាយកប្រតិបត្តិប្រតិបត្តិការ នៃគ្រឹះស្ថានមីក្រូហិរញ្ញវត្ថុ ហត្ថាកសិករ លីមីធីត។ លោកក៏ធ្លាប់បម្រើការងារនៅធនាគារអេស៊ីលីដា ក្នុងមុខដំណែងជាគណៈគ្រប់គ្រងជាន់ខ្ពស់ក្នុងផ្នែកពាណិជ្ជកម្ម ឥណទាន ប្រតិបត្តិការ និងហិរញ្ញប្បទានពាណិជ្ជកម្ម។ លោកបានចាប់ផ្តើមការងារក្នុងវិស័យធនាគារដំបូងរបស់លោកគឺនៅធនាគារអេស៊ីលីដា។

លោក តូច ចៅចេក បានបញ្ចប់ថ្នាក់អនុបណ្ឌិតផ្នែកធនាគារ និងហិរញ្ញវត្ថុ ពីសកលវិទ្យាល័យកម្ពុជា បរិញ្ញាបត្រនីតិសាធារណៈ ពីសកលវិទ្យាល័យច្បាប់ និងវិទ្យាសាស្ត្រសេដ្ឋកិច្ច និងបរិញ្ញាបត្រផ្នែកទីផ្សារ ពីសកលវិទ្យាល័យជាតិគ្រប់គ្រង។

អភិបាលឯករាជ្យ

លោក Neo Poh Kiat ធ្លាប់មានតួនាទីជានាយកគ្រប់គ្រងក្រុមហ៊ុន Octagon Advisors និង ជាក្រុមប្រឹក្សាភិបាលឯករាជ្យ នៃក្រុមហ៊ុន China Yuchai International Ltd, Capital និងក្រុមហ៊ុន ValueMax Group Ltd។

មុនពេលចូលបម្រើការងារជាទីប្រឹក្សា Octagon Advisors លោកបានបម្រើការក្នុងតួនាទីជាអនុប្រធាននាយកជាន់ខ្ពស់ និងជាមន្រ្តីទំនាក់ទំនងប្រទេសចិន នៃSingapore’s United Overseas Bank (UOB)។ លោកជាអ្នកទទួលខុសត្រូវផ្នែកទំនាក់ទំនងក្រុមហ៊ុន និងសាជីវកម្មរបស់ធនាគារ UOB ដែលមានមូលដ្ឋាននៅទីក្រុងហុងកុង។

មុនពេលចូលបម្រើការងារជាមួយធនាគារ UOB លោកក៏ធ្លាប់បម្រើការងារក្នុងធនាគារ DBS លើមុខតំណែងផ្សេងៗជាច្រើន ដែលមុខតំណែងចុងក្រោយរបស់លោកគឺជានាយកគ្រប់គ្រង និងចាត់ការទូទៅរបស់ធនាគារ DBS សាខាហុងកុង។ ទន្ទឹមនឹងនេះ លោកក៏ធ្លាប់ជានាយកប្រតិបត្តិ និងជាសមាជិកនៃ គណៈកម្មាធិការនាយក នៃធនាគារ DBS Kwong និងជានាយកគ្រប់គ្រងក្រុមហ៊ុនវិនិយោគ DBS Asia Capital Limited ដែលជាបុត្រសម្ព័ន្ធរបស់ធនាគារ DBS ក្នុងទីក្រុងហុងកុង។ លោកបានចូលរួមយ៉ាងសកម្មនៅក្នុងការបង្កើតក្រុមហ៊ុន DBS Securities Hong Kong និងក្រោយមកលោកបានក្លាយជានាយកគ្រប់គ្រងនាដើមទសវត្សរ៍៩០។

លោក Neo Poh Kiat ទទួលបានបរិញ្ញាបត្រពាណិជ្ជកម្ម (Honours) ពីអតីត សាកលវិទ្យាល័យ Nanyang University ប្រទេសសិង្ហបុរី។