កំណើនសេដ្ឋកិច្ចប្រទេសកម្ពុជាត្រូវបានគេប៉ាន់ស្មានថាបន្តងើបឡើងក្នុងអត្រា៥,៥% ខ្ដស់ជាងឆ្នាំមុនបន្តិច(៥,២%) ដែលគាំទ្រជាចម្បងដោយកំណើនវិស័យទេសចរណ៍ និងផលិតផលកម្មន្តសាលមិនមែនកាត់ដេរ បើទោះបីវិស័យកាត់ដេរ សំណង់ អចលនទ្រព្យ និងកសិកម្មមានកំណើនទាបក៏ដោយ។ វិស័យទេសចរណ៍បានកើនឡើងជាលំដាប់ និងបានរួមចំណែកជំរុញការងើបឡើងនៃសកម្មភាពសេដ្ឋកិច្ចក្នុងស្រុកដែលពាក់ព័ន្ធដូចជា ការដឹកជញ្ជូន ពាណិជ្ចកម្ម និងទូរគមនាគមន៍ ជាដើម។
ខណៈដែលអត្រាអតិផរណាពិភពលោកបានថយចុះដល់៦,៩% អត្រាអតិផរណាកម្ដុជាបានថមថយមកកម្រិតជាមធ្យម២,១% នាឆ្នាំ២០២៣ ពី៥,៤% នាឆ្នាំ២០២២ ដោយសារការធ្លាក់ថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈ និងការថយល្បឿននៃកំណើនថ្លៃម្ហូបអាហារ។ អតិផរណាក្នុងកម្រិតទាប ក៏បានរួមចំណែកដោយការថយចុះអតិផរណាការនាំចូល ដែលជាលទ្ធផលទទួលបានពីការរក្សាបានស្ថេរភាពអត្រាប្តូរប្រាក់រៀលធៀបនឹងដុល្លារអាមេរិក។ អត្រាប្តូរប្រាក់ជាមធ្យមមានកម្រិត ៤១១០រៀលក្នុងមួយដុល្លារអាមេរិក ហើយនៅចុងខែធ្នូឆ្នាំ២០២៣ អត្រាប្តូរប្រាក់បានថយចុះបន្តិចមក ៤០៨១រៀលក្នុងមួយដុល្លារអាមេរិក។
វិស័យមីក្រូហិរញ្ញវត្ថុបាន នឹងកំពុងដើរតួរយ៉ាងសំខាន់ក្នុងការធ្វើឱ្យប្រសើរឡើងលើបរិយាប័នហិរញ្ញវត្ថុ តាមរយៈការផ្សព្វផ្សាយនិងប្រើប្រាស់នូវសេវាហិរញ្ញវត្ថុផ្លូវការ ដែលទំាងនេះត្រូវបានឆ្លុះបញ្ចាំងតាមរយៈចំនួនអ្នកប្រើប្រាស់លើគណនីសន្សំជាង២លានគណនី និងអ្នកប្រើប្រាស់កម្ចីចំនួន១,៦លានគណនី។ គ្រឹះស្ថានមីក្រូហិរញ្ញវត្ថុ កំពុងមានប្រតិបត្តិការចំនួន៩១២ទីតាំងការិយាល័យគ្របដណ្តប់ទូទាំងប្រទេសកម្ពុជា ក្នុងកិច្ចការងារផ្តល់សេវាកម្មហិរញ្ញវត្ថុដល់អតិថិជនគោលដៅរបស់ខ្លួន និងប្រជាជនតាមទីជនបទ។ ស្របពេលជាមួយគ្នានេះផងដែរ គ្រឹះស្ថានមីក្រូហិរញ្ញវត្ថុ បន្តធ្វើទំនើបកម្មនិងធ្វើពិពាធកម្មនៃសេវាកម្មហិរញ្ញវត្ថុរបស់ខ្លួនលើផលិតផលនានារួមមាន ឥណទាន បញ្ញើរសន្សំ ផ្ទេរប្រាក់ និងសេវាអេធីអឹមជាដើម ដើម្បីបំពេញតម្រូវការអតិថិជន។ ប្រជាជននៅតាមទីជនបទដែលមានចំណេះដឹងមានកម្រិតលើការគ្រប់គ្រងហិរញ្ញវត្ថុ ចាប់ផ្តើមផ្លាស់ប្តូរមកប្រើប្រាស់សេវាហិរញ្ញវត្ថុផ្លូវការ ដែលទំាងនេះពួកគេអាចទទួលបាននូវការការពារស្របច្បាប់ និងអត្ថប្រយោជន៍ផ្សេងៗទៀត។
បន្ទាប់ពីការទិញនិងផ្ទេរភាគហ៊ុនជាផ្លូវការដោយធនាគារប្រៃសណីយ៍កម្ពុជាចាប់តំាងពីឆ្នាំ២០១៧មក គ្រឹះស្ថានមីក្រូហិរញ្ញវត្ថុហ្វូណន គឺមានរយៈពេលជាង៧ឆ្នាំដែលទ្រព្យសកម្មរបស់គ្រឹះស្ថានមានការកើនឡើងជាប្រចាំឆ្នាំ។ តួយ៉ាងនៅឆ្នាំ២០១៦ ទ្រព្យសកម្មរបស់គ្រឹះស្ថានមាន១២លានដុល្លារអាមេរិក បន្តកើនឡើងរហូតដល់៨១,៥លានដុល្លារអាមេរិកនាបំណាច់ឆ្នាំ២០២៣។ មុនការផ្ទុះឡើងនៃជំងឺរាតត្បាតសកលកូវីដ១៩ កំណើនមធ្យមនៃទ្រព្យសកម្មប្រចាំឆ្នាំ (CAGR)គឺមាន៦៩% ដែលកំណើននេះមានការធ្លាក់ចុះមកត្រឹម៨,៣%ប្រចាំឆ្នំាក្រោយកូវីដ១៩។ គិតត្រឹមឆ្នាំ២០២៣នេះ គ្រឹះស្ថានស្ថិតក្នុងលំដាប់ខ្ពស់ជាងគេទី៣លើផលប័ត្រឥណទាន និងឈរលេខរៀងទី១លើចំនួនសាខាច្រើនជាងគេ ក្នុងរង្វង់គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើរសន្សំក្នុងប្រទេសកម្ពុជា។ ជាមួយនឹងនិន្នាការនៃសន្ទុះអាជីវកម្មរបស់គ្រឹះស្ថាន មីក្រូហិរញ្ញវត្ថុ ហ្វូណន ភីអិលស៊ី ចាប់តាំងពីការផ្ទេរភាគទុនិកមក នៅដើមឆ្នាំ២០២៣គ្រឹះស្ថានទទួលបានពានរង្វាន់ ជាគ្រឹះស្ថានមីក្រូហិរញ្ញវត្ថុ ដែលរីកចម្រើនលឿនជាងគេក្នុងប្រទេសកម្ពុជា ក្នុងកម្មវិធីពានរង្វាន់ធនាគារនិងហិរញ្ញវត្ថុសកលឆ្នាំ២០២៣។
បន្ទាប់ពីកូវីដ១៩ ពិភពលោកហាក់ស្ថិតក្នុងសម្ពាធឡើងវិញដោយសារសង្គ្រាមរវាងរុស្សី និងអ៊ុយក្រែន។ ការកើនឡើងនៃអតិផរណា តម្រូវការធ្លាក់ចុះការនាំចេញលើវិស័យមួយចំនួននៃវិស័យកម្មន្តសាល និងវិស័យសំណង់ បានធ្វើឱ្យចំណូលប្រជាជនមានការថមថយ ជាពិសេសអ្នកមានចំណូលទាប និងកម្មករដែលស្ថិតក្នុងក្រុមនៃទីផ្សារគោលដៅរបស់មីក្រូហរិញ្ញវត្ថុក្នុងការផ្តល់កម្ចី។ ហ្វូណនមិនខុសពីគ្រឹះស្ថានមីក្រូហិរញ្ញវត្ថុផ្សេង ដែលមានកំណើនលើឥណទានមិនដំណើរការ (NPL)។ ឥណទានមិនដំណើរការក្នុងវិស័យមីក្រូហិរញ្ញវត្ថុមាន៦,៥% និង៥,៤%សម្រាប់វិស័យធនាគារ។ អត្រាផលប័ត្រឥណទានមានហានិភ័យរបស់ហ្វូណន(PAR30+) មាន៥,៤%នៅឆ្នាំ២០២៣។ ក្នុងឆ្នាំ២០២៣នេះ ហ្វូណន មីក្រូហិរញ្ញវត្ថុ ភីអិលស៊ី សម្រេចបានប្រាក់ចំណេញប្រចាំឆ្នាំ២លានដុល្លារអាមេរិក ហើយមានទ្រព្យសកម្មសរុប៨១,៥លានដុល្លារអាមេរិក។ ក្នុងឆ្នាំនេះផងដែរគ្រឹះស្ថានសម្រេចបានអនុបាតប្រាក់ចំណេញធៀបនឹងទ្រព្យសកម្ម (ROA) មាន២,៤% និងអនុបាតប្រាក់ចំណេញធៀបនឹងដើមទុន(ROE) មាន៨,៨%។ បើទោះបីជាអត្រាប្រាក់ចំណេញរបស់ហ្វូណន មានការធ្លាក់ចុះ៣៨,២%ក្នុងឆ្នាំ២០២៣នេះធៀបនឹងឆ្នាំ២០២២ក៏ដោយ គ្រឹះស្ថាននូវប្រសើរជាងអត្រាប្រាក់ចំណេញរបស់វិស័យមីក្រូហិរញ្ញវត្ថុទំាងមូល ដែលធ្លាក់ចុះជាង៧០,៩%។ គម្លាតនៃប្រាក់ចំណេញដែលមានភាពស្តួចស្តើងនេះគឺបណ្តាលមកពីការកើនឡើងនៃផលប័ត្រឥណទានមិនដំណើរការ(NPL) របស់គ្រឹះស្ថាន និងការកើនឡើងថ្លៃដើមហិរញ្ញវត្ថុ។
ការអនុវត្តន៍នូវដំណើរការផ្តល់ឥណទានតាមប្រព័ន្ធបច្ចេកវិទ្យានៃប្រព័ន្ធវាយតម្លៃប្រាក់កម្ចី(Loan Origination System—LoS) ដែលត្រូវបានអភិវឌ្ឍរួចរាល់នោះ ហ្វូណនបានដាក់ឱ្យដំណើរការគ្រប់សាខារបស់ខ្លួនក្នុងឆ្នាំ២០២២ ហើយបច្ចុប្បន្នបាននឹងកំពុងដំណើរការយ៉ាងមានប្រសិទ្ធិភាព។ ជាមួយនឹងដំណើរការស្វ័យប្រវត្តិ ការវាស់វែងនៃលក្ខខណ្ឌឥណទានដូចបានកំណត់ក្នុងប្រព័ន្ធនិងគោលនយោបាយ ការធ្វើសមាហរណកម្មនៃទិន្នន័យខាងក្នុង និងខាងក្រៅស្ថាប័ន (Credit Bureau Cambodia, CBC) ទំាងអស់នេះបានធ្វើឱ្យដំណើរការផ្តល់ឥណទានបានរហ័សជាងមុន ព្រមទំាងកាត់បន្ថយកំហុសក្នុងការអនុវត្តន៍របស់ប្រតិបត្តិករផងដែរ។ មន្ត្រីឥណទានរបស់យើងកំពុងប្រើប្រាស់ថេប្លេត (Tablet) ជំនួសឱ្យការប្រើប្រាស់ទម្រង់ជាក្រដាស់ក្នុងការទទួលសំណើរនិងសិក្សាកម្ចីដល់អតិថិជន។ ហ្វូណនបានធ្វើការវិនិយោគប្រព័ន្ធទំនាក់ទំនងអតិថិជន(Contact center system) ក្នុងឆ្នាំ២០២២ ដើម្បីធ្វើឱ្យកាន់តែប្រសើរក្នុងការគ្រប់គ្រងលើការប្រាស្រ័យទាក់ទងជាមួយអតិថិជន និងការគ្រប់គ្រងលើការទទួល និងដោះស្រាយបណ្តឹងអតិថិជន។ ការបង្កើតនូវទម្រង់តែមួយដែលបញ្ចូលប្រព័ន្ធនៃបណ្តាញទំនាក់ទំនងសង្គមនានារបស់ហ្វូណន ភ្នាក់ងារបម្រើសេវាកម្មអតិថិជនរបស់យើង អាចកត់ត្រា និងឆ្លើយតបទៅកាន់អតិថិជនគោលដៅជាមួយនឹងគុណភាពសេវាកម្មប្រសើរឡើង។ ជាការយកចិត្តទុកដាក់លើតម្រូវការអតិថិជន ហ្វូណនប្តេជ្ញាផ្តល់ឱ្យអតិថិជនគោលដៅនូវបទពិសោធន៍ល្អៗជាមួយគ្រឹះស្ថានជាបន្តបន្ទាប់។ នៅក្នុងផែនការសកម្មភាពប្រចាំឆ្នាំរបស់យើង សម្រាប់សកម្មភាពទំនួលខុសត្រូវសង្គម(CSR) ចាប់តាំងពីឆ្នាំ២០២២មកយុទ្ធនាការអប់រំហិរញ្ញវត្ថុគឺជារបៀបវារៈ ដែលស្របទៅនឹង ផែនការយុទ្ធសាស្ត្រជាតិលើកកម្ពស់បរិយាប័នហិរញ្ញវត្ថុ២០១៩ -២០២៥ ក្នុងផ្នែកយុទ្ធនាការផ្សព្វផ្សាយអំពីការអប់រំហិរញ្ញវត្ថុ។ក្នុងយុទ្ធសាស្រ្តរបស់រដ្ឋាភិបាល ដែលដឹកនាំដោយធនាគារជាតិនៃកម្ពុជានេះ ត្រូវបានបញ្ជាក់ពីតួនាទីរបស់ប្រតិបត្តិករផ្តល់សេវាហិរញ្ញវត្ថុក្នុងកិច្ចការងារយុទ្ធនាការអប់រំហិរញ្ញវត្ថុ។ ក្រៅពីការអនុវត្តន៍លើតម្លាភាពថ្លៃសេវា និងអត្រាការប្រាក់ និងផ្នែកមួយចំនួននៃគោលការណ៍ការពារអតិថិជន ហ្វូណនធ្វើការអនុវត្តន៍ការអប់រំហិរញ្ញវត្ថុដល់អតិថិជន និងគ្រួសារអតិថិជនរបស់ខ្លួនក្នុងឆ្នាំ២០២២ និងបន្តបង្រៀន ផ្សព្វផ្សាយដល់សិស្សានុសិស្សក្នុងកម្រិតអនុវិទ្យល័យស្ថិតក្នុងតំបន់ប្រតិបត្តិការរបស់ហ្វូណនក្នុងឆ្នាំ២០២៣ លើប្រធានបទ “ចំណេះដឹងមូលដ្ឋាន នៃការគ្រប់គ្រង់សាច់ប្រាក់គ្រួសារ”។ យើងបានធ្វើការបោះពុម្ភកូនសៀវភៅអប់រំហិរញ្ញវត្ថុជាង២៥,០០០ក្បាល និងមានផែនការបោះពុម្ភកូនសៀវភៅអប់រំហិរញ្ញវត្ថុនេះបន្ថែមជាង១២,០០០ក្បាលសម្រាប់ឆ្នាំ២០២៤នេះ។ បុគ្គលិកដែលពាក់ព័ន្ធត្រូវបានអញ្ជើញឱ្យចូលរួមក្នុងវគ្គបណ្តុះបណ្តាលគ្រូបង្គោល ដើម្បីធានាបាននូវការចែករំលែកបន្តលើខ្លឹមសារអប់រំហិរញ្ញវត្ថុដល់សហគមន៍ស្របតាមការរំពឹងទុករបស់គណៈគ្រប់គ្រង។
ជាចុងក្រោយ យើងខ្ញុំសូមថ្លែងអំណរគុណយ៉ាងជ្រាវជ្រៅសម្រាប់កិច្ចគាំទ្រ និងការផ្តល់យោបល់ក្នុងពេលកន្លងមកពីសំណាក់អតិថិជន និយ័តករ ភាគទុនិក គ្រប់ដៃគូរសហការ គណៈគ្រប់គ្រង និងបុគ្គលិកទំាងអស់ហើយយើងខ្ញុំមានជំនឿថា ប្រសិនបើគ្មានការគាំទ្រនិងការផ្តល់យោបល់ពីភាគីពាក់ព័ន្ធទំាងអស់នេះទេ ហ្វូណនមិនអាចទទួលបានជោគជ័យមកដល់ថ្ងៃនេះឡើយ។
ជាថ្មីម្តងទៀត យើងខ្ញុំសូមអរគុណ និងរង់ចាំការគាំទ្រយ៉ាងពេញទំហឹងនៅឆ្នាំបន្តបន្ទាប់ទៀត។
សូមទេវតាឆ្នាំថ្មី ប្រសិទ្ធិពរជ័យ សេរីមង្គល វិបុលសុខ ចម្រើនរុងរឿងដល់លោកអ្នក កុំបីឃ្លៀងឃ្លាតឡើយ។
លោក ឃូ ប៊ុនទ្រី
ប្រធាននាយកប្រតិបត្តិ